STREIK: F.v. Randi Sæther, Anne-Karin Engeseth og Trine Naadland er budde på langvarig streik om dei ikkje får gjennom krava sine. Her er dei avbilda saman med dei snart 60 kommunalt tilsette som gjekk ut i streik onsdag. Dei kjem i tillegg til dei 18 personane som vart tekne ut i første runde førre fredag.

Stor streikevilje
Og streikeviljen er på topp får vi opplyst av Trine Naadland, leiar i Fagforbundet Giske. Ho meiner det er mange urettferdige forhold å rydde opp i, og difor all grunn til å leggje ned arbeidet for å prøve å få gjennom krava sine. Likeløn og lik utbetaling av ulempetillegg uansett om ein er fagarbeidar, ufaglært eller høgskuleutdanna er viktige saker. At dei som tener minst også får minst tillegg for helg og kveld er sterkt urettferdig, meiner Naadland.
–Slik det er i dag får den som passar maskinar mykje meir pengar enn den som passar folk, påpeikar Naadland. Det vil ho vekk frå. Ho vil ha ei generell utjamning i forhold til dei som jobbar i stat kontra kommunalt tilsette, der sistnemnde bør behandlast likt lønsmessig med statleg tilsette.

Råkar foreldre
Når snart 80 medlemmar legg ned arbeidet, får det naturleg nok konsekvensar for brukarane av kommunale tenester.
–Skulefritidsordninga vert hardast ramma, så det kan bli vanskeleg for foreldre å få plassert ungane sine, trur Naadland.
–Også barnehagane vert råka av streiken, seier Randi Sæther, tilsett i Vigra barnehage og plasstillitsvalt for dei to kommunale barnehagane Vigra og Giske.
Sæther reagerer for øvrig på at dei ved Vigra barnehage no under streiken driv med omrokkeringar innanfor avdelingane for å lette på personalsituasjonen. Større søsken til dei som er på småbarnsavdelinga vert flytta inn dit.
–Eg føler at det ikkje er heilt rett, uttalar Sæther.
Barnehagane kan rett nok ikkje ta inn fleire ungar enn dei har lov til i forhold til antal vaksne, så dei vert likevel ramma av streiken.

Skitne lokale
Vaktmeistrar og reinhaldarane streikar òg.
–Med tanke på reinhaldet kan det føre til at enkelte plassar må stengast dersom streiken vert langvarig, meiner Naadland.
–Men kva om Giske kommune leiger inn private reinhaldsbyrå til å ta seg av vaskinga?
–Kommunen har ikkje tradisjon for å leige inn private byrå, dei har sine eigne reinhaldarar, og det er i så fall eit tema vi må ta opp til drøfting, svarer leiaren for Fellesforbundet i Giske. Ho understrekar at dei som går på jobb, skal gjere sine vanlege jobbar, og ikkje andres.
–Det er berre fire personar som har lov til å eksempelvis vaske eller operere sentralbordet, og det er ordførar, rådmann og dei to kommunalsjefane, opplyser Naadland.
Stengt er også avfallsplassen på Gjøsund og Giske folkebibliotek.
–For brukarane av biblioteket sin del kan det til dømes skape trøbbel for dei som held på med eksamensoppgåver, sidan dei ikkje får fatt i spesiallitteraturen dei treng.
Etter det Naadland opplyser har dei gitt delvis dispensasjonar til enkelte som er tekne ut i streik. Dei har tatt omsyn til elevar med spesielle behov, tilsette som betaler ut sosialstønad og gitt løyve til å rykkje ut ved eit eventuelt brot i kloakkleidning.