STEMNE: Mange unge tok del i friidrettsarrangementa i helga som vart avslutta med opning og eit stemne for alle deltakarane. Peter Magnus Grytten i tet med stafettpinnen i handa.

Nytenkande
Roar Blindheim gratulerte på vegne av hovudstyret i IL Valder ved å overrekkje blomar til Ole Martin Sæter, Kåre Sæter og Sissel Walderhaug, som står bak mykje av det som har blitt gjort for å få dette til.
- Utan desse nytenkande menneska med deira spanande idear, ei inderleg tru, kraft, vilje og mot ville ikkje dette vorte noko av, fortel han.

Motiverer
Etter talane var det klart for første øvinga: stafett. Friidrettsskulane frå kommunane Giske og Ålesund har øvd sidan fredag. Alle var veldig klare for å kome i gong, både spente deltakarar og ivrige tilskodarar.
Emma Austnes (9), Solveig Eline Ervik (11), Julie Johanne Farstad Dahl (9) og Inga Molnes (11) tykkjer det var ekstra artig å delta når det var opninga av noko heilt nytt.
- Vi synes det er kjempegøy å vere her, seier jentene i kor.
- Kvar fredag har vi friidrettstrening, noko som blir endå kjekkare no når vi kan øve her ute, seier Inga Molnes frå Vigra IL. Dei tre andre er frå IL Valder.
Vidare er alle einige i at dei vil halde på med idrett når dei blir eldre óg.
- Eg tykkjer hekkeløp er det mest morosame på treningane, fortel Julie Johanne, medan Solveig aller helst vil halde på med handball.

Stolte foreldre
Frå tribunen er det vill jubel frå ivrige foreldre som heiar og applauderer for dei flotte deltakarne.
- Stemninga her er kjempebra og det ser verkeleg ut som om barna kosar seg, smiler Oline Røsvik Skjong, som var der for å sjå på dottera si Kamilla.