AVSKJED: Ordførar Knut Støbakk takka for mange gode diskusjonar på rådhuset og godt venskap.

Helsingar
Hovudpersonen sjølv oppsummerer tida si som prest i Giske kommune på denne måten.
- Det har vore veldig innhaldsrikt og meiningsfullt. Det har vore arbeidskrevjande, men stort sett veldig kjekt, seier Reidar. - Det har vore nokre alvorlege dødsfall som har gått nært innpå meg. Eg som prest stiller sjølvsagt opp. Det å sjå at så mange folk i nærmiljøet rundt også stiller opp er svært verdifullt. Eg har også lyst å framheve at song og musikk står så sterkt her ute og at folk verkeleg stiller opp slik at denne delen kjem godt fram, seier Reidar.
Mange flotte helsingar og gåver vart overrekt til Reidar og familien.
- Eg føler meg berre meir og meir begava her eg står, sa Reidar til god stemning i salen. Mange av helsingane beskreiv også Reidar sine interesse og gode emne. Ordførar Knut Støbakk beskreiv Reidar og familien som veldig gode vener og inviterte dei like så godt heim til seg sjølv frå talarstolen. Arne Tunheim stod for ein svært innhaldsrik prolog som mellom anna omhandla Reidar sin dugnadsinnsats på Godøyfjellet i form av å rydde og klippe fjellråser. Sjølvsagt var det lagt opp til song og musikk i avskjedsfesten. Kyrkjekoret Laudamus og Giske mannskor framførte flotte songar, Monica Solbjørg og André Sjåvåg hadde ein flott duett, medan Berit Johansen hadde kveldens andakt.

Blir buande
Reidar Standal har allereie starta i sin nye jobb som sokneprest på Ellingsøya, men han og kona Kjellaug vil enda ha sin bustad på Godøya. Dermed er det fortsatt mogleg for folk å levere motorsagblada sine til sliping, få ein god prat eller nyte flotte fjellturar på Godøyfjellet med fine råser og gode kvileplassar.