FUNN: Under arkeologiske registreringar på Oksneset har arkeolog Lars Hovland funne flintavslag i grunnen, nærmare bestemt restar etter produksjon av reiskap. Her er Hovland avbilda i det området der han har funne dei største flintkonsentrasjonane.

Buplass
På oppdrag frå Møre og Romsdal fylkeskommune har arkeolog Lars Hovland gjort om lag 60 prøvestikk på Oksneset. Det vil seie at han har grave groper på 40 gongar 40 centimeter, tatt ut jordmasse, som han deretter har silt for å finne eventuelt flintavslag. Og flintfunn har han gjort i over halvparten av gropene, enkelte av dei har innehalde ganske store konsentrasjonar.
–Flintavslag er restar etter produksjon av reiskap, og dette er absolutt sikraste indikator på at det har vore ein buplass her tidlegare, forklarer Hovland.

Ved sjøen
Sidan det kun er tale om registreringar, og ikkje omfattande arkeologiske utgravingar, har ikkje arkeologen nok materiale til å stadfeste omfanget av og detaljar om buplassen. Han kan heller ikkje tidfeste når det kan ha budd folk på denne staden, men det kan ha vore så lenge som for 8.000 år sidan.
Hovland fortel at sjøen har gått mykje høgare opp enn det gjer i dag. Truleg har buplassen lege rett ved strandkanten, der dei nyttiggjorde seg av næringsgrunnlaget som sjøen gav dei.
–Dersom det blir gjort utgravingar her, er det gode mulegheiter for å finne til dømes eldstader, som kan nyttast i dateringa. I tillegg kan ein finne ut meir om omfanget og kva slags hus dei hadde, seier arkeologen. Men han understrekar at det er opp til kommunen sjølv å bestemme kor vidt dei vil gjere ytterlegare arkeologiske utgravingar.

Ulike utfall
Planleggjar i Giske kommune, Per Ivar Myklevoll, seier til Øy-Blikk at desse funna kan få ulike utfall for den planlagde bustadbygginga på Oksneset.
–Det kan vere at riksantikvaren meiner funna er så interessante at området må leggjast på vent kva gjeld utbygging, seier Myklevoll. Ei anna mulegheit er at kommunen klipper bort delar av området der det er registrert størst konsentrasjon av spor etter menneskeleg aktivitet, og gjer dette om til eit friområde. Ei tredje mulegheit er at funna vert vurdert som mindre interessante, og kommunen kan halde fram med planen. Myklevoll legg til at dei har halde på med reguleringsplanen i rundt seks år, noko som legg press på at ein snarast må finne ut av kva som bør gjerast.