Lit på staten
Det vil seie at saka om omlegging av vegen i samband med utviding av sikringssonene ved flyplassen, er ute av hendene på politikarane i Giske.
I teorien er det no fullstendig ope om Miljøverndepartementet vedtek ein plan som inneber oppgradering av veg på nordsida og stenging av Sørestrandvegen eller kulvertløysing på vestsida av rullebana. Det er derimot sikkert at Avinor ønskjer det første alternativet, og at Samferdsledepartementet òg støttar dette forslaget, noko som kjem fram i deira anbefaling etter synfaringa på Vigra i oktober. Å leggje veg i Blindheimsvika fuglefredingsområde har Samferdsledepartementet og Direktoratet for naturforvaltning gått sterkt i mot.

Kommuneansvar
Før votering var det politikarar som understreka at det er kommunestyret, og ikkje staten, si oppgåve å avgjere kva løysing som er best for innbyggjarane i Giske kommune.
–Eg meiner det er ei alvorleg sak om vi seier nei til å behandle og avgjere saka sjølve, vi bør ta kampen om realitetane på ærleg og reieleg vis i kommunestyret, meiner Gunnar Morsund (H).
Lars Petter Valderhaug (Frp) støtta Morsunds forslag, og uttrykte frykt for at Miljøverndepartementet ikkje har fått med seg vedtaka som kommunen har fatta og at dei sit med mangelfull informasjon. Han var òg sjokkert over at veg på nordsida av flyplassen og stenging av fylkesveg 135 i sakspapira vart trekt fram, når det vedtaket er oppheva.
Planleggjar Tom Rian forsikra representanten om at alle sakspapir frå første dag er oversendt. Han påpeika vidare at vegalternativet på nordsida vert trekt fram mellom anna på grunn av den sterke tilrådinga Samferdsledepartementet gav tilbake til Miljødepartementet.

Uvisst
Det var Frp-representant Harald Hole som la fram forslaget som til slutt fekk fleirtal. –Eg har kome dit hen at eg vil la departementet avgjere saka. I partiprogrammet seier Frp at vi vil jobbe for å behalde Sørestrandvegen. Eg føler vi no har prøvd alle mulegheiter, og eg meiner det er uheldig viss vi gjer vedtak som gjer at flyplassen vert nedgradert, uttalar Hole. Han meiner òg at det er større tyngde bak eit statleg vedtak samanlikna med eit kommunalt vedtak i forhold til å eventuelt få finansiert ei kulvertløysing.
Morsund nytta høvet til å understreke at det enno er uvisst kven som skal finansiere den nye vegløysinga, uansett kva utfallet vert.

Ikkje feigt
Ordførar Knut Støbakk var ein av dei som stemte for å overlate avgjersla til staten. Han viser til at departementet har fått framlagt absolutt alle sakspapir, frå første søknaden til Avinor vart sendt til alle planvedtak som er fatta, medrekna alle klagar og underskriftslister frå innbyggjarane.
–Er det ikkje feigt å overlate ei slik avgjersle til staten?
–Nei, det meiner eg ikkje. Giske kommune har hatt fleire mulegheiter til å få reguleringsplanen godkjent, men dei sjansane har vi brukt opp, svarer Støbakk. Han meiner fem års sakshandsaming er nok, og han orkar ikkje fleire rundar med politisk handsaming og klagebehandling.
–Trur du enkelte av tilhøyrarane i salen i går vil kalle det ei ansvarsfråskriving?
–Eg ser ikkje vekk frå at enkelte vil tolke det som det, men vi har ikkje berre eit ansvar overfor øvre Vigra, men heile regionen, og det må vi også ta omsyn til, meiner ordføraren.